Nikol Galanteryan

Իններորդ թռիչքը կատարելով Ջերմուկի գեղատեսիլ բնաշխարհում՝ «Բազեն» 7 օր իր թեւերի տակ կհամախմբի 650 հայ երիտասարդների, որոնք ինչպես Հայաստանի տարբեր տարածաշրջաններից են, այնպես էլ Արցախից, Ջավախքից, սփյուռքից։
«Բազե» համահայկական երիտասարդական հավաքի հանդիսավոր բացմանը երեկ ներկա էին ՀՀ վարչապետ Տիգրան Սարգսյանը, ՀՀ սպորտի եւ երիտասարդության հարցերի նախարար Արմեն Գրիգորյանը, Վայոց ձորի մարզպետ Վարդգես Մաթեւոսյանը եւ այլք։
Արմեն Գրիգորյանն ընթերցեց ՀՀ նախագահ Սերժ Սարգսյանի ողջույնի ուղերձը, որում ասված էր. «Ողջունում եմ «Բազե—2008» համահայկական երիտասարդական հավաքի մասնակիցերին եւ կազմակերպիչներին։ Կարեւորում եմ հայրենաբնակ եւ աշխարհասփյուռ հայ երիտասարդության համախմբման գաղափարը եւ գործը՝ որպես համազգային ներուժի կազմակերպման եւ բացահայտման կարեւոր բաղադրիչ։ Ուրախ եմ, որ ավանդական դարձած համահայկական այս հավաքը ընդայնում է իր աշխարահագրությունը, ընդգրկում նոր գաղթօջախներ եւ մեծաթիվ մասնակիցներ։ Համոզված եմ, որ հավաքի ծրագրի հագեցվածությունն ու մարզական, մշակութային, ինտելեկտուալ մրցույթների բազմազանությունը մասնակիցներին հնարավորություն կընձեռեն դրսեւորելու իրենց ունակություններն ու գիտելիքները, ինչպես նաեւ շփվելու եւ տեղեկատվություն փոխանակելու միմյանց հետ։ Տեղյակ եմ եւ մեծապես կարեւորում եմ «Բազե—2008»-ի շրջանակներում բանավեճերի, քննարկումների, հանդիպումների նշանակությունը, հոգեւոր եւ հայրենասիրական դաստիարակության, Հայ առաքելական եկեղեցու դերի բարձրացմանն ուղղված միջոցառումների շարքը։ Մենք բաց ենք քննարկումների արդյունքում վեր հանած ձեր առաջարկների եւ գաղափարների առջեւ։ Համոզված եմ, որ հայ երիտասարդության համախմբմանն ուղված «Բազե-2008» համահայկական երիտասարդական հավաքը կծառայի իր բուն նպատակին։ Կրկին ողջունելով «Բազե»-ին՝ մաղթում եմ բարձր թռիչք, հավաքի մասնակիցներին՝ մեր հայրենիքի եւ ապագայի նկատմամբ խոր համոզվածություն»։
Հայ առաքելական եկեղեցու Սյունյաց թեմի առաջնորդ Աբրահամ եպիկոսպոս Մկրտչյանը փոխանցեց Ամենայն հայոց կաթողիկոս Ն.Ս.Օ.Տ.Տ. Գարեգին Երկրորդի օրհնության խոսքը, որում Վեհափառն իր հայրապետական օրհնությունն էր հղում հավաքի մասնակիցներին եւ կազմակերպմանը գովելի աջակցություն բերած բոլոր հայորդիներին։ «Երիտասարդությունը նույնպես իր մեծ դերն ունի հայապահպանության եւ հայ մշակույթի զարգացման կարեւոր առաքելության մեջ։ Սիրելի զավակներ մեր, դուք մեր հայրերից հարուստ ժառանգություն եք ստացել՝ ոսկեղենիկ հայոց լեզուն, հոգեւոր անգին արժեքներ, գիրն ու դպրությունը եւ բազմագանձ մեր մշակույթը։ Ձեր աստվածաշնորհ կյանքի ընթացքը դուք պիտի արժեւորեք եւ նոր ձեռքբերումներով հարստացնենք ձեզ ավանդածը, որպես մեր նախնիների արժանավոր հետեւորդներ»,–ասված էր Ամենայն հայոց կաթողիկոսի ուղերձում։
Վարչապետ Տիգրան Սարգսյանը, ով ողջունելով բազեականներին՝ նշեց, որ տպավորված է այն խանդավառությունից, որ տիրում է երիտասարդների շարքերում։ «Այս ամենը ոգեւորիչ է։ Մտածում էի մեր երկրի ապագայի մասին, որովհետեւ այն կլինի այնպիսին, ինչպիսին դուք եք պատկերացնում։ Այն արժեքները, որ կա ձեր մեջ, հենց այդպիսի Հայաստան էլ դուք ստեղծելու եք։
...Ոգեւորված եմ նաեւ, որովհետեւ այն գաղափարները, որոնք ձեզ միավորել են այստեղ, ընկած են նորակազմ կառավարության ծրագրի հիմքում»,–ասաց Տ. Սարգսյանը՝ ուրախությամբ ընդգծելով, որ նմանատիպ հավաքները հնարավորություններ են ընձեռում աշխարհով մեկ սփռված հայերին համախմբելու։
Բազեականները Ջերմուկում կմրցեն, նկարչությունից, նորաձեւությունից, երգից, պարից, քանդակագործությունից։
«25 ակումբ» հասարակական կազմակերպությունը համահայկական հավաքի ընթացքում կազմակերպել է նաեւ արյունատվության ակցիա, որի առաջին դոնորը եղավ ՀՀ վարչապետը։ Արյունը կհանձնվի ՀՀ առողջապահության նախարարության՝ պրոֆեսոր Յոլյանի անվան արյունաբանական կենտրոնին։ «Այստեղ արյունը հավաքելուց հետո մենք Երեւանում լաբորատոր հետազոտության արդյունքում կպարզենք, թե մեր ցուցակում գրանցված մարդկանցից ովքեր կարող են մեզ դոնորներ դառնալ։ Համենայն դեպս, ողջունելի է, որ վարչապետը իր քայլով խրախուսեց երիտասարդներին, որ այս քայլը եւ հայրենանվեր գործ է»,–ասաց «25» ակումբի հիմնադիրներից Աննա Սահակյանը։
Հավաքի մյուս օրերին նախատեսվում է, որ մասնակիցներին կայցելեն նաեւ նախագահ Սերժ Սարգսյանը, պաշտպանության նախարար Սեյրան Օհանյանը, երկրորդ նախագահ Ռոբերտ Քոչարյանը, սփյուռքի հետ կապերի կոմիտեի նախագահ Հրանուշ Հակոբյանը, այլ բարձրաստիճան պաշտոնյաներ։
Հայկական եռագույնը, ինչպես «Բազե» համահայկական հավաքի տնօրեն Արթուր Սողոմոնյանը հայտնեց, կծածանվի Ջերմուկում երկրորդ անգամ։
Ինչպես «ՀՀ»–ին հայտնեց Արթուր Սողոմոնյանը, այս անգամ հավաքի ծրագրում տեղի են ունեցել որոշ փոփոխություններ. օրինակ, բանավիճային ակումբը տեղափոխվել է մրցակցային դաշտ։ Հավաքին մասնակցող ջոկատներն այս տարի բաղկացած են լինելու ոչ թե 12–ական հոգուց, այլ 9, ավելացել է ջոկատների քանակը։ Հավաքի ղեկավարը նաեւ հայտնեց, որ մասնակից բազեականները վերջին օրը ուխտագնացություն կկատարեն, եւ Ջերմուկի Ս. Գայանե եկեղեցում մոտ 50 մասնակիցներ կմկրտվեն։
Նշենք նաեւ, որ 650 բազեականներից այս տարի 150–ը սփյուռքահայեր են։